شيخ زايد .. وحكايه… استقاله (ودمهنا)
* ..و نحدث عن ودمهنا.. عسكري في حرس الصيد..من (حله بله)احدي قري الدندر . المتاخمه لحظيره الدندر. وحكايته مع شيخ زايد
رئيس دوله الامارات .والرئيس نميري.. حين زيارتهما لمدينه الدندر و حظيرتها الشهيره..
* جمعتني بودمهنا.. ايام زاهرات في حله بله
التي جيئتها ومعي الاخ اسماعيل عوض الكريم. من أبناء العماره طه.ويومها كان طالبا
بجامعه الخرطوم كليه الاقتصاد.. لزياره شقيقه
السر عوض الكريم..خبير الغابات بمنطقه كامراب
وحله بله..تلك القريه التي محفوره في ذاكرتي رغم طول السنين..حيث وداعتهاو .جمال طبيعتها.وعيشها الرغد ..
ومااجمل فيها انسانها الودود الجميل الدواخل
وسماحته وكرمه.وما فوق ذلك..عطفا علي
نسيجها الاجتماعي المغزول من شتي السحنات
فخيوطه من عده قبائل. فحله بله قدرت أن تمزق.شهاده القبليه بقبول الآخر وأن تستخرج
.. لمكونها الاجتماعي.. شهاده
باسم ناس (حله بله.)ف.في الذاكره الترزي عثمان.ومحمد ضابط الصيد. ود موسي الضابط
البجاوي. وحكاوي تحكيها حله بله .عن موسي عليه رحمه الله .حكاها لهم عن الحظيره التي ..
جاءت به عسكريا لها.فاختار حله بله مقاما. وسكنا ..واختار ابنه محمد ابن حله بله كليه ضباط الصيد……
ملتصقا بالحظيره التي احبها والده وتلميذه في
المهنه .( ودمهنا)..الذي تعود أصوله الي عرب دارفور..
وفي الذاكره دار بله الواسعه الديوان المفتوح
وابسطه الكرم الممدوده.وكمال بله وشخوص
في منتهي الجمال الانساني..
*وود مهنا . يحدثنا عن الحظيره وحزنه عليها ..
يوم أن فارقها.لكنه لم ينقطع عن زيارتها..فبحزن
عميق حكي لنا أسباب استقالته من مصلحه الصيد.بعد أن قضي في الحظيره ربع قرن من الزمان..فقال…
**جاالرئيس نميري في زياره الي الدندر المدينه ..
ومعه الشيخ زايد رئيس دوله الإمارات..فتم استدعانا إلي( القويسي.). واستقبلته المنطقه باستقبال حاشدو . احتفل شيخ المنصور العجب
بالضيف الزائر .. احتفالا عظيما..
*وبعدها اخبرنا (السنوسني) مدير عام قوات الصيد.بان الضيف حيزور الحظيره في رحله
صيد.ومعه صقره الخاص.. .. وهو صقر غالي.. وتقوموا بالأزم .
والنميري.داير اصطاد اسد.. دي اوامرنا..
وانتهي كلامو معانا.فزعلت لكن كتمتوا في بطني.. فالقانون يمنع صيد الاسود والافيال.الخ
*فكانت الرحله الي الحظيره. ولما جينا لصيد
الاسد ولمعرفتي بالحظيره .سقتهم لمكان فيه
اسد عجوز ..فاصطاده النميري وبالجد الراجل
نياش. والله ختاها ليهو في جبهتو.ف
قلت في نفسي .اصلو الاسد ده منتهي..ما في
خساره..وقلت لواحد زميلي لما عجبتني تنشين
نميري( .اسد وكتله اسد..)..
،*اها لما جينا للصقر ..والله صقير .. اكبر شويه
من الغراب.. الشيخ كان ماسكوا ولما ظهر قطيع
الغزلان.فكاهو … حقيقه سريع خلاص..وبقي
مطاردن.ولماخلاص اتمكن.من واحده..نشوف ليك.كميه من الصقور جات نازله .عليهو ..
ووقعت فيهو نتفت ريشو نتف. ماخلت في.جلدو ريشه . ونزلت في الصيده نتش …..
*أ ها هنا الضيف اناثر شديد علي صقرو.. واتاثروا جماعتو المعاهو.. صقر غالي جايبنو بالطياره..( وضحك) وقال يا ربي ده بقطعوا ليهو تزكره ،،،!!!(وواصل)…,لكن
عرفت انو بعد رجع اهدوا ليهو صقريين
رسلوهن بالطياره..
فصقورنا ديل صعبات .صقر اجي وحيد وجديد
عليهن بقطعنوا..بدون كلام..
*اها من ديك عزمت استقيل ..وقلت الحظيره
وكت قانونا اتكسر هي كمان بعد شويه بتتكسر.. فرحم الله ود مهنا ..ورحم الله الحظيره التي
زحفت عليها المشاريع الزراعيه.فابتلعتها وكسرتها
*هاهو التاريخ قد استدار…فذات طيور الحظيره..لم تقبل صقر شيخ زايد … المتعدي علي حرمها..
فذاتها صقور السودان.تنتف ريش بغاث طيرك.
يا ابليس العرب…