نجوي عبدالقيوم تكتب..الله يكفينا شر الوحم والناس البتاكل الفحم

قهوة نسوان

نسوان حلتنا عندهم ختة اسبوعية، بتلموا كل يوم اربعاء بعد الساعة 12:30 ظهراً في بيت ست الختة وبرنامجهم قهوة وفيشار وونسات خطيرة وعجيبة، وبعدها بعملوا قرعة لست الصرفة الجاية.

الموضوع بشكله دا طبيعي جدا ويمكن يكون مكرر في كثير من احياء وقرى وفرقان السودان، بس العندنا في حلتنا بختلف شوية، لطبيعة ونسة النسوان والقضايا المطروحة، وطريقة نقاشها، ومداخلاتها، وحقيقة أنا من شدة ما بقيت مدمنة لشمارات الحلة وخبارات النسوان بقيت انتظر اليوم بشغف شديد، ومرات ابطل شغلتي واحرسهم.

نسوان القهوة يتحدثن بلا تحفظات عما يدور في غرف ازواجهن، وما يدور بين النسابا، ويتبادلن الخبرات في الجيهة والمنجهة، والفسخ والجلخ وفنيات الدخان، بلا حياء، وكانهن اخوات اشقاء، وساحاول في سلسلة من المقالات أن انقل بعضاً مما يمكن نقله، وانا واثقة بان ما يتم طرحه ونقاشه يمس الكثير من البيوت، عسى ولعل ان تجد احداكن حلاً لمشكلة تطابقت احداثها فالبيوت التي لا تخلو من الاشكالات الاجتماعية.

عشان ما تنصدموا من أول حلقة بالمشاكل الحاصلة، نحكي ليكم أكثر يوم ضحكنا فيهو، لدرجة أنه القهقهة خلت البيت زي المسرح، وبالمناسبة الونسة بتجر براها، واليوم داك فاطمة بت النور  ما جات وادت قروش الختة لبخيتة وقالت ليها بطني طامة وعندي دوخة، بخيتة بعد دفعت حقها وحق فاطمة اعتذرت لجارتها وقالت ليهم ربنا يحلها بالسلامة شكلها بتتوحم، وقالت ليهم لو وريتكم بتتوحم بي شنو ما بتصدقوا؟ الجماعة كلهم منتظرين الاجابة، قالت ليهم قالت بتتوحم بنمل، وبتسال هل أكل النمل حرام أم حلال وخصمتني إلا نتصرف ليها في نمل .. لا وكمان بتتشرط عاوزة النمل الأسود مالح و نمل السكر تحليه ..!!

وقتها تحولت الجلسة الى فوضى من الصراخ والضحك، ونعمات ضحكت لما نفسها اتكتم، مناهل بصوتها المزعج قالت لي  بعد تخش في الشهور الكبيرة و تشتهي الباعوض ادينا خبر، بت الناير قالت والله مصيبتها كبيرة وعندها نسيبة كان عرفت قصة وحم النمل بتكلم قناة الجزيرة، لان مرة فاطمة نست وطعمت ملاح الغدا مرتين وطلع ملحو كتير نسيتها كلمت اخواتها بالتلفون وبناتها وكلمت الجيران، التاية قالت (الله يكفينا شر الوحم والناس البتاكل الفحم).