*إيهاب محمد نصر يكتب..العبط الاداري*
*كلمتين ونص*
من أشكال (العبط الادارى) فى هذا البلد (المنحوس) ان موظفى وتقنيى وعمال التعليم العالى مضربون عن العمل نسبة للمرتبات الهزيلة التى يتقاضونها! قومى يا التعليم العالى ظبطى مرتبات شريحة الأساتذة ويستحقو ، ويا بقية الكوادر المساعدة (طقو راسكم فى الحيطه) يقومو دوول ناس طقو راسكم فى الحيطة يعملوا إضراب وحالفين يمين ثلاثه لو ما صلحو مرتباتهم ذى الأساتذة ما يشتغلوا. اها (الهبل الادارى) وعباطة التصرف انو الوزارة توجه الجامعات ببدء الدراسة او الجامعات براها قررت استئناف الدراسة ما فارقة كوووولو ياهو العبط والهبل، المشكلة وين؟ المشكلة انو الطلاب ديل حيجو من كل فج عميق ويلقو الجامعات ما شغاله عرفتو أين تكمن المشكلة؟ يا اى والى ويا اى لجنه امنيه بتاعة ولاية لو المدراء ديل ما عاقلين ابقو انتو العاقلين لانو الطلاب ديل كان جو ولقو الجامعه ما شغاله ووقعو فليق فى البلد والله ما خاتين، انتو قايلين تزاكر السفر هينى؟